سُدومئے گناه
19
بێگاها، دوێن پرێشتگ سُدوما سر بوتنت.
لوت شهرئے دروازگئے دپا نِشتگاَت.
وهدے پرێشتگی دیستنت، پاد آتک و آیانی پێشوازیا شت، په اَدب سَری جَهل کرت و
2 گوَشتی:
”او منی واجهان!
وتی کَسترئے لۆگا بیاێت و وتی پادان بشۆدێت.
شپا همِدا بجلّێت و بامگواها سر بگرێت.“
آیان گوَشت:
”اِنّه، ما وتی شپا شهرئے چارراها گوازێنێن.“
3 بله لوتا همینچک مِنَّت کرتنت که آیان راه تاب دات و لوتئے لۆگا شتنت گۆن.
لوتا په آیان شامے تئیار کرت، بێهُمیرێن نگنی اَڈّ کرت و آیان وارت.
4 آ اَنگت نئوَپتگاَتنت که چه سُدومئے هر کُنڈا سجّهێن مردێن، پیر و وَرنا آتکنت و لۆگِش اَنگِرّ* کرت.
5 آیان لوت گْوانک جت و گوَشت:
”همے بچکّ که اِنشپی تئیی لۆگا آتکگاَنت، کُجا اَنت؟
مئے کِرّا بیارِش که ما گۆن آیان وپت و وابَ کنێن.“
6 لوت ڈَنّا در آتک و پُشتا دروازگی بند کرت.
7 گوَشتی:
”نه، منی براتان!
من دَستَ بَندان، اے بدێن کارا مکنێت.
8 بچارێت، منا دو جنێنچُکّ هست که اَنگت گۆن هچّ مردێنا وپت و وابِش نکرتگ.
من آیان شمئے کِرّا کاران، گۆن آیان هرچے شمئے دلَ لۆٹیت، بکنێت.
بله اے مردمان کار مدارێت که منی لۆگا آتکگاَنت و منی مئیار اَنت.“
9 آیان گوَشت:
”یکّ کِرّ بئے“ و وتمانوتا گوَشتِش:
”اے مرد دَرامَدے اَت و مئے شهرا آتکگ.
نون مئے مَستریا کنگَ لۆٹیت.“
پدا گۆن لوتا گوَشتِش:
”نون ما تئیی جِندا چه اے بچکّان گنترَ کنێن.“
لوتِش تێلانک دئیان کرت و دێما شتنت که دروازگا بپرۆشنت.
10 بله پرێشتگان دست ڈنّا شهارت، لوتِش لۆگئے تها کَشِّت و دروازگِش بَست.
11 پرێشتگان، دروازگئے دپئے مردمانی، وَرنا و پیرێنانی چمّ تهار کرتنت که دروازگا در گێتک مکننت.
12 نون آ دوێنان گۆن لوتا گوَشت:
”ترا اِدا دگه کَسے هست، زامات، بَچّ، جنکّ، یا دگه سیاد و وارِسے که اے شهرا اِنت؟
اگن هست، گڑا چه اِدا دَرِش کن
13 که ما اے جاگها تباهَ کنێن.
اے شهرئے هلاپا اَنچێن مزنێن پریاتے هُداوندا سر بوتگ که مارا په اے شهرئے تباه کنگا رئوانی داتگ.“
14 گڑا لوت شت و وتی زاماتی گوَشتنت، هما که گۆن آییئے جنکّان سانگ کنگی اَتنت:
”اِشتاپ کنێت و چه اِدا در کپێت که هُداوند اے شهرا تباهَ کنت.“
بله آییئے زاماتان دلا گوَشت که لوت مسکرا کنگا اِنت.
لوت چه شهرا درَ کئیت
15 بامگواه که بوت، پرێشتگان لوت هُجّ کرت و گوَشت:
”زوتّ کن وتی جَن و دوێن جنکّان چه اِدا بزور و برئو، اگن نه اے شهر که سِزا دئیگَ بیت، شما هم رۆپگ و برگَ بێت.“
16 بله لوتا که دێر کرت، آ مردان، لوت و لوتئے جَن و دوێن جنکّ دستا گِپتنت و چه شهرا ڈنّ برتنت، چێا که هُداوندا آیانی سرا رَهم کرتگاَت.
17 وهدے آاِش چه شهرا ڈنّ برتنت، چه پرێشتگان یکّێا گوَشت:
”بتَچ و پُشتا چَکّ مجن.
دشتا هچّ جاگه مهاۆشت.
دێم په کۆهان بتَچ، اگن نه رۆپگ و برَگَ بئے.“
18 بله لوتا گوَشت:
”اِنّه واجهان!
رهم کنێت.
19 شما منی سرا، وتی کَسترئے سرا رهم کرتگ و گۆن منی زِندئے رَکّێنگا پێش داشتگ که چینکدر مهربان اێت.
بله من دێم په کۆهان تتکَ نکنان.
چۆ مبیت که اے تباهی منا مان برۆپیت و من بمِران.
20 بچار، منی نزّیکّا شهرے هست که دێم په آییا تتکَ کنان.
کَسانێن شهرے، بِلّ که دێم په آییا بتَچان.
اے وَه کَسانێن شهرے، نه؟
گڑا منی جانَ رَکّیت.“
21 پرێشتگا گوَشت:
”شَرّ اِنت، تئیی اے واهگا پورهَ کنان و اے شهرئے ناما که تئو گرگا ائے، اِشیا تباهَ نکنان.
22 بله زوتّ بتَچ و برئو.
تانکه تئو اۆدا سرَ نبئے، من هچّ کرتَ نکنان.“
پمێشکا اے شهرئے نامِش سۆهَر* کرت.
سُدوم و گُمورهئے تباهی
23 لوت که سۆهَرا رَست، رۆچا نۆکی ٹِکّ کرتگاَت.
24 گڑا هُداوندا سُدوم و گُمورَهئے سرا آس و گۆکُرت گْوارێنت.
اے آس و گۆکُرت چه هُداوندئے نێمگا، چه آسمانا رِتکنت.
25 اے پئیما، هُداوندا آ شهر و سجّهێن دَشت و شهرانی سجّهێن جَهمنند و سبزگ تباه کرتنت.
26 بله لوتئے جَنا پُشتا چَکّ جَت و وادئے بُتے بوت.
27 اِبراهێم سُهبا ماهلّه پاد آتک و هما جاگها شت که پێسریگێن رَندا هُداوندئے بارگاها اۆشتاتگاَت.
28 سُدوم و گُمورَهئے نێمگا، جَهلا، سجّهێن دشتئے نێمگا چارتی و دیستی که چه زمینا بزێن دوتّے چست اِنت، چۆ کورَهئے* دوتّا.
29 هُدایا که دشتئے شهر سَر و چێر کرتنت، اِبراهێمئے تْرانگا کپت.
هما شهران که لوت جَهمنند بوتگاَت، آیانی تباه کنگئے وهدا هُدایا لوت چه اۆدا در کرت.
لوت و لوتئے جنکّ
30 لوت گۆن وتی دوێن جنکّان چه سۆهَرا لَڈّت و کۆهستگا جَهمنند بوت، چێا که سۆهَرا نِندَگی تُرست.
لوت گۆن دوێن جنکّان گارێئے تها نِشت.
31 یکّ رۆچے مسترێن جنکّا گۆن کَسترێنا گوَشت:
”مئے پت پیر اِنت و اِدا دگه هچّ مردێنے نێست که گۆن ما وپت و وابے بکنت، اَنچۆ که سجّهێن دنیائے دۆد اِنت.
32 بیا پِتا شرابَ وارێنێن و گۆن آییا وپت و وابَ کنێن که چه هماییا وتی نَسل و پَدرێچا دێما ببرێن.“
33 آ شپا وتی پتِش شراب وارێنت و مسترێن جنکّ شت و گۆن پتا وپت و وابی کرت.
لوت نه آییئے وپسگا سهیگ بوت، نه پاد آیگا.
34 دومی رۆچا مسترێن جنکّا گۆن کَسترێنا گوَشت:
”دۆشی من شت و گۆن پتا وپتان، بیا اِنشپی پدا شرابیَ دئیێن و تئو برئو و گۆن آییا بوَپس.
چه هماییا وتی نَسل و پَدرێچا دێما برێن.“
35 گڑا پێسریگێن شپئے پئیما وتی پتِش شراب وارێنت، کَسترێن جنکّ پاد آتک و گۆن پتا وَپت و وابی کرت.
لوت نه آییئے وپسگا سهیگ بوت، نه پاد آیگا.
36 لوتئے دوێن جنکّ چه وتی پتا لاپپُرّ بوتنت.
37 مسترێن جنکّا مردێنچُکّے بوت و نامی موآب* کرت.
موآب، مرۆچیگێن موآبیانی پت اِنت.
38 کَسترێن جنکّا هم مردێنچُکّے بوت و نامی بِناَمّی* کرت.
بِناَمّی مرۆچیگێن اَمّونیانی پت اِنت.